قبل أن نودّع عام 2025 ونستقبل العام الجديد بطاقة جديدة وابتسامة، هاي فرصة حقيقية نتوقّف لحظة ونسأل حالنا:

هل حققنا الأهداف اللي وضعناها؟ هل وفّرنا كيف ما تمنينا؟ وهل أدرنا أموالنا بحكمة، أم أنّها هي الي أدارتنا؟

حتى لو كانت الإجابات مش دايمًا مثل ما بدّنا، الخبر السارّ إنّ الفرصة الآن مثالية للتغيير — مش لازم نعمل ثورة مالية، فقط خطوات بسيطة ممكن تغيّر كثير في سنة 2026.

1. هاي السنة... بدنا نعرف وين بتروح المصاري!

خلص زمن “ما بدي أشوف الحساب”.

افتحوا تطبيق البنك مرّة باليوم، ولو لخمس دقائق مع فنجان القهوة الصبح.

تابعوا مصروفاتكم، حتى الصغيرة منها مثل القهوة، التوصيل، الاشتراك الشهري، لأنّ الصورة الكبيرة بتبدأ من التفاصيل الصغيرة.

هيك ما بتتفاجؤوا بنهاية الشهر، وبتصيروا أنتم اللي بتتحكموا بالمصروف، مش العكس.

2. هاي السنة... بنبني ميزانية ذكية وبنلتزم فيها!

الميزانية مش تقييد، هي خريطة طريق للراحة النفسية.

لما نعرف شو بدخل علينا وشو بيطلع، بنحس بسيطرة وطمأنينة.

جربوا أداة إدارة الميزانية في المركز للنمو المالي - سهلة الاستخدام ومجانية.

ما تخلّوا الأرقام “معلّقة بالهوا”، خلّوها تحت السيطرة.

3. هاي السنة... بنتعلّم نوفر حتى لو شوي!

وفّروا مبلغ ثابت كل شهر حتى لو بسيط، المهم الالتزام. 

ابدأوا من اليوم، حتى بـ50 شيكل بالشهر.

لما التوفير يصير عادة، بتكتشفوا بعد فترة إنكم عملتوا خطوة كبيرة بدون ما تحسّوا.

احكوا مع حالكم: “المصاري اللي منوفّرها اليوم هي هديّة للمستقبل.” 

“القرش الأبيض بينفع باليوم الأسود” — مثل قديم بيذكّرنا إنّ التوفير مش رفاهية، هو أمان للمستقبل.

4. هاي السنة... بنودّع المصروفات الزايدة!

اشتراك بالجيم بس ما منروح عليه؟ تطبيقات ناسيين نلغيها؟ تأمينين على نفس السيارة؟

كلها فرص لتوفير ذكي.

جربوا “يوم التدقيق المالي” مرّة بالشهر - اقعدوا مع العيلة، وافحصوا مع بعض شو ممكن توقفوا أو تخفّفوا.

خلوها جلسة خفيفة فيها شاي ودفتر ملاحظات.

ما خاب من اقتصد — مثل بسيط، بس حقيقي، اللي بيعرف يوفّر اليوم، بيعيش أريح بكرا.

5. هاي السنة... بنشتري بعقل مش بعجلة!

الشراء الذكي يعني راحة مالية.

قبل أي عملية شراء، استنوا 24 ساعة واسألوا: “هل أنا فعلاً بحاجة لهذا؟”

اعملوا “قائمة الأحلام” بالأشياء اللي نفسكم فيها، وارجعوا إلها بعد أسبوع.

اللي بيضل مهم بعد أسبوع هو اللي يستحق المصروف.

والذكاء الاصطناعي صار صديقكم الجديد، اسألوه عن مقارنة الأسعار والعروض، ووفّروا بسهولة.

6. هاي السنة... بنستثمر بمعرفتنا المالية!

المعرفة المالية مش رفاهية ، هي أمان واستقلالية.

خصصوا وقت بالشهر تتعلموا فيه عن الحقوق المالية، التوفير، أو الاستثمار.

زوروا موقع المركز للنمو المالي وسجّلوا بالمحاضرات والدورات — كلها بالعربية ومجانية.

كل معلومة جديدة بتقرّبكم من حياة مالية أريح.

7. وهاي السنة... بنعلّم أولادنا عن المصاري!

السنة الجديدة مش بس فرصة نرتّب حالنا ماليًا هي كمان فرصة نزرع الوعي المالي عند أولادنا.

المصاري جزء من الحياة اليومية، ومهم يتعلّموا منّا من الصِغَر كيف يديروها بعقل ومسؤولية.

ابدأوا بخطوات بسيطة:

خلّوا الأولاد يشاركوا بتخطيط المصروف العائلي، احكوا معهم عن الفرق بين احتياجات ورغبات، وخلّوهم يوفّروا من مصروفهم الأسبوعي لهدف معيّن.

هيك منربّي جيل بعرف قيمة كل شيكل، وبيفهم إنّ المصاري وسيلة مش غاية.

من علّم ولده حسن التدبير، فقد أعطاه مفتاح الغنى.

فشو أول خطوة رح تبدأوا فيها مع سنة 2026؟

سنة سعيدة، عام مليء بالنجاح والتوازن المالي.

*المعلومات الواردة في موقع المركز للنموّ المالي وفي المقال هي معلومات عامة وتهدف إلى توسيع المعرفة في مواضيع مختلفة. قد تكون المعلومات جزئية و/أو غير محدثة وبالتالي لا يمكنها أن تشكّل بديلًا عن تلقّي الاستشارة الفرديّة التي تراعي احتياجات الفرد.